Hyrwyddo ymgyrch Defnyddia dy Gymraeg

Rydym yn cefnogi’r ymgyrch genedlaethol ‘Defnyddia dy Gymraeg’ sy’n cael ei drefnu gan Gomisiynydd y Gymraeg ac sydd wedi cael ei lansio heddiw (Dydd Llun, Tachwedd 25).

Bydd yr ymgych, sy’n rhedeg tan Rhagfyr  yn hybua hyrwyddo’r defnydd o’r Gymraeg,  a hynny ym mhob agwedd o fywyd.

Mae’r ymgyrch yn anelu at godi hyder, ac at gynyddu’r defnydd o wasanaethau Cymraeg, gan wireddu’r weledigaeth o Gymru lle gall pobl fyw yn Gymraeg.

Dywedodd Aled Davies, ein Pennaeth Llywodraethu: “Rydym yn ymfalchïo yn y ffaith ein bod ni’n gallu cynnig ein gwasanaethau drwy gyfrwng y Gymraeg.  Mae nifer fawr o bobl yn defnyddio ein gwasanaethau ar-lein a dros y ffôn yn yr iaith, ond rydym yn dymuno hyrwyddo’r sianeli hyn er mwyn annog rhagor o bobl i’w defnyddio.

“Rydym yn gweithredu ar draws rhan helaeth o siroedd y Gogledd, yn arbennig yng Ngwynedd, felly mae darparu gwasanaethau Cymraeg o’r radd flaenaf yn rhan bwysig o’n diwylliant a sicrhau bod ein trigolion a chwsmeriaid yn gallu cyrchu gwybodaeth yn eu dewis iaith.

“Mae 98% o’n staff yn siarad Cymraeg ac rydym wedi ymrwymo yn ein cynllun iaith i gynyddu defnydd o’r gwasanaethau.

“Rydym hefyd yn falch o allu gweithredu er mwyn cyfrannu i’r ymgyrch genedlaethol gan Lywodraeth Cymru i gyrraedd miliwn o siaradwyr Cymraeg erbyn 2050. Mae hi’n hynod o bwysig bod ein tenantiaid yn gwybod eu hawliau o ran disgwyl gwasanaeth gennym yn Gymraeg. Mae hi’n gyfrifoldeb arnom ni i gyd i chwarae ein rhan”.