Gofyn am ganiatâd i wneud gwelliannau
I wneud cais am addasiadau cwblhewch y ffurflen gais yma
Meddwl am wneud newidiadau i’ch cartref neu ardd?
Nid oes angen cysylltu â ni ar gyfer newidiadau bach fel addurno neu osod carpedi.
Ar gyfer newidiadau mwy, cysylltwch â ni yn gyntaf. Bydd angen caniatâd ysgrifenedig cyn gwneud unrhyw addasiadau i’ch cartref neu ardd.
Beth sy’n digwydd ar ôl i mi ofyn am ganiatâd?
Bydd eich cais yn cael ei gymeradwyo neu wrthod 28 diwrnod ar ôl i ni dderbyn eich cais.
Dyma enghreifftiau o addasiadau lle mae angen caniatâd:
- Gosod drysau a ffenestri yn lle’r rhai hen
- Gwaith strwythurol fel addasu a thynnu wal fewnol
- Adeiladu estyniadau neu ychwanegiadau i’r cartref
- Adeiladu neu dynnu strwythur mewn gardd gan gynnwys sied, tŷ gwydr, wal neu ffens
- Ychwanegu, addasu neu dynnu unrhyw wasanaethau trydanol neu ddŵr
- Ychwanegu neu newid unedau mewn cegin
- Gosod ystafell ymolchi newydd neu ychwanegu at offer yr ystafell ymolchi
- Torri coeden yn yr ardd
- Gosod dreif neu groesfan palmant
- Addurno tu allan i’r cartref
- Lleoli carafanau a chychod
- Trwsio neu osod ffitiadau i inswleiddio ar wal allanol
- Gosod to ‘lean-to’
- Gosod llawr laminet
- Unrhyw waith i’r atig
- Gosod camerâu TCC (CCTV)
- Gosod system wresogi (ni chaiff boeleri aml-danwydd eu caniatáu)
- Unrhyw waith trydanol
Beth sy’n digwydd os nad oes gen i ganiatâd?
Mae’n bwysig cael caniatâd cyn gwneud unrhyw newidiadau neu welliannau i’ch cartref.
Os byddwch yn mynd ymlaen heb ganiatâd, gallech dorri telerau eich contract meddiannaeth neu reoliadau cynllunio/rheoli adeiladu.
Efallai y byddwn yn gofyn i chi adfer yr eiddo i’w gyflwr gwreiddiol, a bydd angen i chi drefnu a thalu am hyn.
Oes angen caniatâd arall arnaf?
Yn ogystal â chael caniatâd gennym ni, efallai y bydd angen caniatâd gan wasanaethau eraill y cyngor, megis:
- Priffyrdd
- Gwasanaethau Cynllunio
- Rheoli Adeiladu
Er enghraifft, bydd angen i chi gysylltu â’r adran Briffyrdd yn eich cyngor lleol i wneud cais am Adran 184 (Deddf Priffyrdd 1980) cyn gwneud cais am ffordd fynediad neu groesiad palmant.
A oes angen gwybodaeth ychwanegol arnaf?
Oes – rhowch fanylion clir am eich cynlluniau a sut bydd y gwaith yn effeithio ar eich cartref.
Dylech gynnwys:
- Lluniadau graddfa (neu frasluniau wedi’u llunio’n daclus gyda mesuriadau os nad yw lluniadau’n bosibl)
- Lluniau sy’n dangos yr ardal gyfan a chynlluniau agos o ble bydd y gwaith yn digwydd
- Amserlen y gwaith, gan gynnwys manylion y cynhyrchion a’r deunyddiau rydych yn bwriadu eu defnyddio
Beth sydd angen i mi ei wneud i gael caniatâd?
- Llenwch y ffurflen gais (neu gofynnwch am un drwy ffonio 0300 123 8084 neu e-bostio gwasanaethau.cwsmer@adra.co.uk)
- Arhoswch am ein caniatâd ysgrifenedig neu unrhyw amodau y mae angen eu bodloni
- Rhowch wybod i ni pan fydd y gwaith wedi’i gwblhau – efallai y bydd angen i ni archwilio i sicrhau bod popeth wedi’i wneud yn iawn